Mokabat sa P15 milyones nga balor sa disaster response assistance ug gawas pa kini sa mga face masks ug alcohol, ang gipagawas sa Department of Education (DepEd) Central Visayas alang sa mga lugar nga apektado sa pagbuto sa Bulkang Kanlaon.
Gipaambit ni DepEd 7 Director Salustiano Jimenez nga ang hinabang gipagawas niadtong miaging semana sa Canlaon City ug Guihulngan City.
Gibutyag usab ni Jimenez nga 43 ka tunghaan ang apektado sa pagbuto diin 38 niini kay pampubliko ug lima ka pribado sa Canlaon City, ingon man nga 9 niini nga pampublikong tunghaan kay direktang naapektuhan.
Kini nga mga tunghaan nahimutang sa lima ka barangay nga giila sa Philippine Institute of Volcanology and Seismology (Phivolcs) nga sulod sa six-kilometer danger zone.
Sa pikas bahin, gisaysay usab ni Dr. Salustiano nga dako og epekto ang pagkunhod sa 2025 budget sa buhatan sa DEPED hilabi na nga ang rehiyon 7 ang usa sa mga giisip nga dakong rehiyon sa tibuok nasud, ingom man dako usab kini og epekto sa Computerization Program niini.
Apan, bisan pa sa pagkunhod sa budget, mamahimo gihapon nga makadawat ang ahensya og mga donasyon gikan sa mga non-government organizations.
