CEBU – Gipasabot ni Department of Education (DepEd) 7 ang importansya sa Brigada Eskwela una ang hingpit nga pag-abli sa klase.
Gitino ni Dr Salustiano Jimenez, ang regional director sa DepEd 7, nga dako ug tabang sa matag tunghaan ang Brigada Eskwela arun nga ma-andam ang mga tunghaan alang sa mga bata nga musulod na sa ilahang mga klase.
Matud pa, importante nga sa pag-abli sa klase, dili na kinahanglan nga manglimpyo o mag-ayo sa mga guba nga classrooms ang mga tinun-an, ug magtutok na lang gayud sa ilahang pagtungha.
Hinuon, giklaro ni Dr Jimenez nga dili kini pinugsanay ug nagpabilin gayud kini nga voluntary alang sa mga ginikanan o mga guardians nga mutambong sa Brigada Eskwela.
Samtang, giawhag usab sa naasoy nga opisyal ang mga ginikanan nga magpa-enroll na sa ilahang mga bata arun nga makita na sa ahensya ang gidaghanon sa mga tinun-an, ingon man nga makita ang mga kuwang arun nga dali nila kining ma-‘address’.
