CENTRAL VISAYAS-Nanghinaot ang direktor sa Department of Education Central Visayas (DepEd-7) nga ang mga tunghaan sa rehiyon tanan “child-friendly.”
Matud ni DepEd-7 Director Salustiano Jimenez kini aron matubag ang mga kaso sa bullying nga nahitabo gihapon bisan pa sa paningkamot sa departamento sa pagpasiugda sa anti-bullying campaign.
Bisan og wala niya ipiho ang mga numero, si Jimenez miingon nga ang rehiyonal nga buhatan nakadawat og daghang mga taho sa mga kaso sa bullying.
Kasagaran, matud pa ni Jimenez, ang mga magtutudlo maoy mo-report sa maong hitabo ngadto sa rehiyonal nga buhatan, ug ang nadestino nga abogado gikan sa rehiyonal nga buhatan maoy modumala sa kaso o sitwasyon.
Gipasalig niya nga ang maong mga taho giatiman ug gidumala.
Mao kini ang hinungdan nga siya miingon nga “every school shall be a child-friendly school and at the same time, school free from bullying” aron ang Rehiyon 7 momenos ngadto sa walay kaso sa bullying.
Nanawagan usab si Jimenez sa tanang mga ginikanan sa rehiyon nga sa matag higayon nga makamatikod sila nga adunay kalit nga pagbag-o sa pamatasan o binuhatan sa ilang mga anak nga adunay kalabotan sa bullying, dili sila mahadlok nga ireport kini sa dibisyon ug rehiyonal nga opisina sa DepEd.
Matod niya nga dili kini aron ma-sensasyon ang sitwasyon apan para kini sa mga awtoridad nga sulbaron ang maong butang aron dili na kini mahitabo pag-usab.
