Nipatuman ang Department of Education (DepEd) Region 7 sa paggamit sa Learning Continuity Spaces (LCS) aron mapugngan ang pagkabalda sa pagtuon sa mga tinun-an gumikan sa mga natural nga kalamidad ug sa nagpadayong kakulangan sa lawak-tunghaan.
Kini nga lakang gihimo dungan sa kakuwangon sa 10,000 ka mga classrooms sa tibuok Central Visayas, diin ang Sugbo nanginahanglan og 8,287 ka mga lawak samtang ang Bohol, lakip ang Dakbayan sa Tagbilaran, nanginahanglan pa og 1,713 ka classrooms.
Gipasabot ni DepEd Region 7 Regional Director Dr. Arturo B. Bayocot, CESO III, nga ang maong mga temporaryong istruktura naghatag og luwas ug haom nga dapit-tunghaan samtang nagpaabot pa sa pagkahuman sa mga permanenteng edipisyo.
Sumala ni Bayocot, ang regular ug permanenteng classroom ginama sa semento, adunay sukod nga 7 by 9 meters, nagkinahanglan og mas dako nga pundo nga mokabat sa P3 milyon o kapin pa, ug nagkinahanglan og mas taas nga panahon sa pagtukod.
Sa laing bahin, ang LCS nga kanhi gitawag og temporary learning shelters, daling matukod gamit ang mga prefabricated materials ug aduna nay pundo nga dul-an sa P2 milyon matag usa. Gidisenyo kini aron daling magamit sa mga estudyante ug makasugakod sa mga kalamidad.
Gidugang ni Bayocot nga kung maayo ang pagkaatiman ug dili madaot sa mga katalagman, ang lifespan o dagan sa LCS mahimong molungtad og hangtod sa 10 ka tuig.
Gawas sa bag-ong desinyo sa LCS, padayon gihapon nga gigamit ug gi-upgrade sa DepEd ang mga daan nga Temporary Learning Shelter (TLS) model aron mosubay sa sumbanan sa bag-ong LCS. Kini nga mga TLS mas barato ang pagpatuman ug dako og tabang isip dugang pasilidad sa rehiyon tungod kay mas paspas kining mahuman itandi sa mga naandan nga sementadong building.
