Gibutyag ni Department of Education Regional Director Salustiano Jimenez, nga nindot ang plano sa Senado nga ihapak ang budget sa flood control project ngadto na sa pagpatukod sa mga nagkadaiyang school buildings sa DepEd, aron masulbad ang problema sa kakulangan sa edipisyo.
Kini human sa imbestigasyon sa senado sa nakalabayng senate blue ribbon committee hearing, maylabut na sa anomaluso ug kwestiyunableng mga paggasto sa pundo alang sa flood control project.
Apan mipasabut usab ni Salustiano, nga kinahanglang balansehon ang plano sa senado kung ugaling ihapak ang budget sa buhatan sa DPWH ngadto sa DepEd, tungod lamang sa palpak nga paggasto alang sa flood control project.
Matud niini, posible kining makaapekto sa pagtungha sa mga istudyante gumikan kay mahinungdanon usab ang paghatag ug kasulbaran sa grabeng mga nasinati nga pagbaha sa publiko, hilabi na sa Central Visayas.
Giklaro usab sa Regional Director, nga wala ra siyay pagkontra kung ugaling adunay plano ang senado sa paghapak sa budget sa flood control project ngadto na sa DepEd, hilabi na ug mapakyas ang DPWH sa pagsulbad sa baha.
Kahinumdoman, niadtong Miyerkules, Agusto 20, 2025, gikuwestiyon sa senate blue ribbon committee ang mga gidudahang anumalusong paggasto sa flood control project sa DPWH, ug mihulga si Senador Win Gatchalian, nga ihapak ang P274 Billion nga budget ngadto na sa DepEd.
