Gikonsiderar karon sa Department of Education (DepEd) ang pagpatuman sa trimester system alang sa umaabot nga school year 2026-2027 isip kabahin sa usa ka “holistic approach” sa mga estudyante.
Sumala ni DepEd Secretary Sonny Angara, ang sistema nagtumong sa pagbaton og mas taas ug mas padayon nga pagtudlo, hustong dagan sa mga leksyon, ug mas ubos nga administratibong palas-anon alang sa mga magtutudlo.
Ubos sa trimester system, ang 201 ka adlaw sa eskwelahan bahinon sa tulo ka termino diin ang unang termino modagan gikan Hunyo hangtod Septyembre; ikaduhang termino: Septyembre hangtod Disyembre; ikatulong termino: Enero hangtod sa Marso.
Ang matag termino adunay 54 hangtod 61 ka adlaw nga pagtudlo, nga adunay gagmay nga mga pahulay sa mga dili akademikong kalihokan ug mga enrichment block.
Sumala sa DepEd, mag-isyu sila og mga giya sa palisiya sa trimester calendar sa umaabot nga mga adlaw human sa pagkonsulta sa mga stakeholder.
Sa samang higayon, ang DepEd nagduso usab alang sa mga alternatibo nga ubos ang pagkabalda, diin ang mga selebrasyon ug pagsaulog sa eskwelahan mahimong i-integrate sa aktwal nga mga output sa klase aron malikayan ang pagkabalda sa pagtudlo.
