Gipahimangnoan sa Department of Education (DepEd) ang publiko nga dili magpalingla sa peke nga post online nga nanghatag ang ahensya og cash aid para sa tanang graduating students karong 2024.
Ang ahensya ni-isyu sa maong misinformation alert karong semanaha sa mga nag-circulate online kalabot sa peke nga cash assistance nga nagkantidad og P8,000 alang sa graduating students sa Class of 2024.
Matod sa post nga adunay logo sa DepEd ug litrato ni VP ug Education Sec. Sara Duterte, kinahanglang mosumiter ang mga aplikante og PSA birth certificate, moral certificate ug ilang report card aron maka-qualify sa cash assistance.
Giingong abli kini alang sa mga tinun-an sa elementarya, high school ug kolehiyo nga mogradwar ug ang deadline sa pagpalista gikatakda karong Mayo 20.
Kini na ang ikaupat nga higayon nga nipagawas og pasidaan ang DepEd kalabot sa mga post nga nagtanyag og bogus nga cash assistance o scholarship alang sa mga estudyante.
Kalabot niini, giawhag sa DepEd ang publiko nga i-report ang mga sayop ug kadudahang impormasyon kalabot sa batakang edukasyon sa depedactioncenter@deped.gov.ph.
