Gidasig ni Department of Education (DepEd) Secretary Juan Edgardo “Sonny” Angara ang kapin sa 4,000 ka mga atleta gikan sa unom ka probinsiya ug duha ka siyudad sa Cordillera Administrative Region (CAR) sa pagpadayon sa pagpaningkamot nga makarepresentar sa nasud sa mga international sports competitions.
Ang hepe sa DepEd maoy guest speaker atol sa pag-abli sa Cordillera Administrative Region Athletic Association (CARAA) meet niadtong Domingo sa Wangal Sports Complex sa La Trinidad, Benguet.
Diin ang probinsiya maoy host sa tinuig nga grassroots athletic event sa Cordillera nga gipasiugdahan sa DepEd.
Matod niya nga ang Olympic gold medalists nga sila si Carlos Yulo ug Hidilyn Diaz, ug ang world champion nga si EJ Obiena nakaangkon usab sa ilang bahin sa kapildihan sa wala pa sila makaabot sa kinapungkayan sa kalampusan.
Gikanayon niini nga kung mahinumduman, napildi si Hidilyn sa Beijing ug London Olympics sa wala pa siya nakakuha og silver sa Rio De Janiero ug ang bulawan sa Tokyo Olympics. Sama ni Carlos nga daghang pildi sa wala pa niya malangkat ang duha ka bulawang medalya sa Olympics, ingon man si EJ nga padayon ang pagkab-ot sa ilang kalampusan nga makakuha og bulawang medalya.
Ingon man nga ang mga kompetisyon dili lang bahin sa pagkolekta og medalya apan kini mahitungod sa adlaw-adlaw nga kinabuhi nga giatubang uban ang kaisog.
Gipaambit usab ni Angara nga sa Palarong Pambansa nga ipahigayon sa Ilocos Norte karong Mayo, iapil ang weightlifting ug pole vaulting isip bag-ong competition areas.
Sa laing bahin, gipahalipayan ni Angara ang Cordillera nga maoy nag-una sa medal tally sa wushu ug taekwondo atol sa miaging Palarong Pambansa sa Sugbo.
