Gipalig-on sa Department of Education (DepEd) ug Department of the Interior and Local Government (DILG) ang seguridad sa mga eskwelahan pinaagi sa pagbutang og mga barangay tanod ug pagpalapad sa nasudnong 911 emergency system ngadto sa mga institusyon sa edukasyon.
Kini nga inisyatiba gilangkob sa usa ka joint memorandum circular nga gipirmahan sa duha ka ahensya niadtong Oktubre 14 ubos sa pagpangulo ni Education Secretary Sonny Angara ug Interior Secretary Jonvic Remulla dungan sa usa ka school safety audit ug emergency drill nga gipahigayon sa Bangkal High School sa Makati City.
Subay sa kasabutan, ang mga eskwelahan mahimong makig-alayon sa ilang tagsa-tagsa ka *barangay* aron mangayo og tabang gikan sa mga *barangay tanod* sa pagmintinar sa kahusay ug seguridad, sulod ug sa palibot sa eskwelahan.
Hinuon, giklaro sa DepEd nga ang mga *barangay tanod* dili mopuli sa mga awtoridad sa eskwelahan o sa mga opisyal sa pagpatuman sa balaod. Moagi usab sila og *orientation* aron masiguro ang pagsunod sa mga polisiya mahitungod sa pagpanalipod sa mga bata, katungod sa mga estudyante, ug kaluwasan sa eskwelahan.
Gawas sa pagpalig-on sa suporta sa seguridad, ang DepEd iapil usab sa hiniusa nga 911 *emergency system* sa DILG, uban ang tabang sa kompanya sa teknolohiya nga NGA Philippines.
Pinaagi niini nga sistema, ang Philippine National Police (PNP) ug ang DepEd dungan nga makadawat og mga taho bahin sa mga emerhensya, nga makapadali sa pagtubag ug koordinasyon tali sa duha ka ahensya.
Dugang pa, ang mga gitaho nga insidente ipaubos sa *validation* o beripikasyon sa mga opisina sa DepEd—sa sentral, rehiyonal, ug *schools division* nga lebel. Sumala sa NGA Philippines, tumong niini nga inisyatiba nga muboan ang proseso nga kaniadto mokabat og pipila ka semana, ngadto na sa usa ka adlaw lamang, samtang gihimo usab nga sentralisado ang pagtipig sa impormasyon.
Gilunsad sa DILG ang usa ka hiniusa nga *emergency hotline* niadtong Septyembre 2025, nga naghiusa sa kapin sa 30 ka lokal nga *emergency hotline* ngadto sa usa na lang ka serbisyo.
Kini nga lakang nagtumong sa pagpalig-on sa mga mekanismo sa pagtubag alang sa mga insidente sa kapintasan, pagpamusil, ug uban pang mga hulga sa kaluwasan sa mga estudyante ug kawani sa eskwelahan.
