Gipanghimakak sa kampo ni Bise Presidente Sara Duterte nga naningkamot kini nga mapugngan ang pagpagawas sa iyang mga rekord sa bangko ug buhis nga gipangayo sa House prosecution panel sa impeachment trial.
Sumala ni Atty. Michael Poa, tigpamaba sa defense team, wala sila nahadlok nga ipagawas ang mga rekord sa bangko ni VP Sara, apan gusto lang nila nga masiguro nga ang proseso nahiuyon sa balaod ug sa Konstitusyon.
Dugang nga gipasiugda sa depensa nga klaro ang pahayag sa Korte Suprema bahin sa katungod sa privacy ug due process, mao nga ilang gipahinumdoman ang mga senador nga nagsilbing mga huwes sa impeachment trial.
Mahinumduman nga sa ikaunom nga adlaw sa husay, gihisgutan ang gibag-o nga hangyo sa mga piskal sa House nga ang Senado mo-isyu og subpoena aron makuha ang mga rekord sa bangko ug mga dokumento sa buhis ni Sara Duterte ug Mans Carpio.
Sa laing bahin, gisupak sa depensa ang hangyo sa prosekusyon tungod kay alang kanila, kini mahimong usa lamang ka “fishing expedition” o pagpangita og ebidensya nga walay igong basehan.
Ang kampo sa Bise Presidente miingon usab nga ang katungod sa privacy sa magtiayong Duterte ug Carpio mahimong malapas kung imando ang pagpagawas sa ilang mga rekord sa pinansyal.
Dugang sa depensa nga maghulat sila sa desisyon sa impeachment court ug ibasi nila ang sunod nga mga lakang niini, nga nagpasiugda nga ang pagkolekta sa ebidensya kinahanglan nga nahiuyon sa Konstitusyon ug sa lagda sa balaod.
