Subsob na karon ang pagpangandam sa Cebu City Government nunot sa nagsing-abot nga kalag-kalag karong tuiga.
Subay niini, sugdan na karong adlawa, Oktobre 28 ang pagpakatap sa mga tanod, ug sakop sa mga kapulisan alang sa early security deployment.
Apan, ang hingpit nga pagbantay sa matag sam-ang, pormal nga sugdan sa petsa 30 ning buwana hangtud na sa Nobyembre 2, diin hingpit na nga ipatuman ang mas istrikto nga mga lagda aron masubay ug ma-osberbaran ang hapsay ang kalag-kalag.
Gani, ang buhatan sa Cebu City Transportation Office (CCTO) nagbuhat na usab og traffic plan alang sa mga minteryo ug ingun man mga simbahan, ilabi na nga sa Dakbayan sa Sugbo adunay 21 ka mga minteryo, diin ang 8 niini ma konsiderar nga labing crowded.
Sa gikabutyag ni Cebu City Mayor Nestor Archival, nakigtagbo na siya sa mga department heads ingun man sa sakop sa kapulisan aron na sa pagpahamtang sa mga nahisgutang lakang.
Samtang ang Department of General Services, nagpadayon gihapon sa ilahang pagpanghinlo sa mga minteryo ingun man ang pangpangolekta sa mga basura.
Gisiguro usab sa Cebu City Government nga lakip sa ilahang gipangandaman mao ang ilahang ka andam ugaling adunay motumaw usab nga wala damhang katalagman.
Sa pikas bahin, adunay ipahamtang usab nga gitawag og “greenzone” alang sa mga manindahay kung diin adunay ipamutang mga markings ang mga sakop sa City Government aron malimitahan ang mga luna sa mga manindahay aron nga dili sila makabalda atol na sa kalag-kalag.
Subay niini, hingpit nga gidili ang pagpanuroy og mga tinda sulod sa minteryo, ingun man ang mga indibidwal nga manguha og kandila, buwak o pagkaon, hinungdan nga kung si kinsa man gali ang mamatyagan, badlungon gayud.
