CEBU CITY-Gihimug-atan ni Atty. Jose Daluz, ang chairman sa Metropolitan Cebu Water District (MCWD) nga dako og ikatabang ang desalination plant sa pagtubag sa kakuwang sa tubig ilabi na sa panahon sa ting-init.
Gibutyag ni Daluz nga tinguha nila nga mahimo nang operational ang dessalination plant karung tuiga sa Barangay Mambaling, dakbayan sa Sugbo, diin dako og ikatabang sa pag-supply og tubig sa South ug North District.
Matud pa, gawas sa Barangay Mambaling, tinguha nila nga magamit na usab ang dessalination plant sa Mandaue City ug Cordova.
Sigon ni Atty. Daluz nga solusyon ang maong planta ilabi na karun nga nagka-init ang kalibotan ug gamay na lang ang fresh water nga mahimong ma-inom sa mga tawo.
Sa pagkakarun, gitino niini nga nakunhoran na og dul-an sa 50,000 cubic meter ang nawala sa MCWD gumikan sa pagkunhod sa lebel sa tubig sa ilahang water sources.
