CEBU – Kapin sa P256 milyones nga balor sa nagkalain-laing matang sa ilegal nga drugas ang nasunog sa Cosmopolitan Funeral Homes dinhi sa dakbayan sa Sugbo.
Sa nahisgutang kantidad, niabot sa 36,953.37 gramos ang shabu, 372.269 gramos ang marijuana, 3.65 mL nga nalbuphine hydrochloride ug 2,984 ka tabletas ang ecstacy.
Sa pakighinabi sa Bombo News Team kang Leia Albiar-Alcantara, ang tigpamaba sa PDEA 7, iyang gibutyag nga karong tuiga mao na kini ang ikaduhang ‘destruction of dangerous drugs’ nga gihimo sa ilang ahensya uban sa Police Regional Office 7.
Sa paglingkod ni PDEA 7 Regional Director Levi Ortiz, matod niya, ikapito na kini nga ‘destruction of dangerous drugs’ nga gihimo.
Apan matod ni Alcantara, walo ka mga pagsunog sa ilegal nga drugas ang nahimo nga mobalor og P885.64 milyones.
Gianunsyo niini nga ang ahensya nangandam sa pagpahigayon og laing ‘destruction of dangerous drugs’ sa Disyembre 13, 2022 o sa dili pa matapos ang tuig.
Kini base usab sa hangyo sa Police Regional Office 7.
Gipasalig ni Alcantara nga walay ‘recycling’ sa ilegal nga drugas ug gisunod lang sa ilang ahensya ang mga proseso nga gikinahanglan sa dili pa sunogon ang ilegal nga drugas.
