Gikompirmar sa Department of Foreign Affairs (DFA) nga wala’y Pilipino nga naangol sa sunod-sunod nga pagbuto sa gatusan ka pager ug walkie talkie nga gigamit sa mga sakop sa militanteng grupong Hezbollah sa Lebanon niadtong Martes ug Miyerkules.
Matod ni DFA USec. Eduardo De Vega, konektado sa Hezbollah ang naasoy nga mga casualties ug matud niya nga nagtuo sila nga walay Filipino nga miyembro sa maong militanteng grupo.
Kalabot niini, subling giawhag sa kagamhanan sa Pilipinas ang mga Pilipino sa Lebanon nga mobakwit sa dili pa hingpit nga migrabe ang sitwasyon sa maong nasud.
Samtang, gipahibalo ni USec. De Vega nga adunay mga Pinoy nga dugay nang anaa sa Lebanon nga dili na makauli tungod kay kadaghanan mga walay dokumento nga mga trabahante sa panimalay.
Ug pipila sa mga Filipino nga nagbasi sa maong nasud kay mga skilled workers, magtutudlo, office worker, hospital workers ug sa negosyo sa hospitality.
Sa pagkakaron gipaubos na ang Lebanon sa Crisis Alert Level 3 ug ang mga awtoridad nagpaabot sa go signal aron mapataas ang alert level human sa mga eksplosibong insidente.
