Nanawagan ang Department of Foreign Affairs (DFA) sa China nga sigurohon ang kaayohan ug mga katungod sa kapin 100 ka Pilipinong gidakop tungod sa giingong ilegal nga pagtrabaho o pagpuyo sa nasud.
Gikumpirma sa DFA ang mga pag-aresto human miingon ang Chinese Foreign Ministry nga mihimo kini og aksyon batok sa kapin 100 ka Pilipino nga gidudahang ilegal nga nagtrabaho sa China.
Giingon sa DFA nga giila sa Pilipinas ang katungod sa China sa pagpatuman sa kaugalingong immigration laws, basta sundon ang hustong proseso.
Bisan pa, gihangyo sa ahensya ang mga awtoridad sa China nga protektahan ang kaayohan sa mga nadakpang Pilipino ug ipahibalo dayon sa Philippine Foreign Service Posts ang ilang pagkabilanggo.
Sumala sa DFA, nahiuyon kini sa Vienna Convention on Consular Relations ug sa 2013 Philippines-China Consular Agreement.
Nakig-alayon na ang DFA sa Philippine Embassy sa Beijing ug sa Philippine Consulate-General sa China aron mahibal-an ang eksaktong gidaghanon sa mga nadakpang Pilipino ug ang mga hinungdan sa ilang pagkabilanggo.
Gisusi usab sa ahensya kung gisunod ba ang hustong legal ug consular procedures sa pag-aresto sa mga Pilipino.
Samtang, kusganong gisaway ni Defense Secretary Gilbert Teodoro ang pag-aresto sa mga Pilipino sa China.
Gitawag niya kini nga usa ka matang sa “blackmail” ug gikondena ang giingong paggamit sa mga Pilipino isip paagi sa pagpanghilabot sa proseso sa pagpatuman sa balaod sa Pilipinas.
