Magbinantayon ang Department of Foreign Affairs (DFA) sa ilang pamaagi sa pagpasiugda og resolusyon sa United Nations General Assembly (UNGA) nga gitumong sa pagkondenar sa ilegal nga kalihokan sa China sa West Philippine Sea (WPS), gumikan sa sensitibo nga kinaiya sa relasyon sa Pilipinas sa China, ug ang posibleng epekto niini sa ubang mga isyu.
Gitataw sa DFA nga abli sila sa posibilidad nga suportahan ang gisugyot nga resolusyon nga nanawagan sa China nga hunongon dayon ang tanan nga ilegal nga kalihokan sulod sa WPS, ug respetuhon ang 2016 arbitral ruling pabor sa Pilipinas, subay sa United Nations Convention on the Law of the Sea (UNCLOS).
Atol sa pagdungog sa budget sa DFA atubangan sa House Committee on Appropriations, si Mamamayang Liberal Party-list Representative Leila de Lima mipadayag sa iyang interes ug nangutana sa ahensya kung kanus-a ug sa unsang paagi ilang plano nga ipasaka ang nasangpit nga resolusyon sa UNGA. Gihangyo ni De Lima nga adunay klarong timeline ug estratehiya ang DFA sa pagpaasdang sa resolusyon.
Ang gitumong nga resolusyon unang gisang-at ni De Lima sa Kamara, diin giawhag niini ang gobyerno sa Pilipinas nga gamiton ang tingog ug impluwensya niini sulod sa UN aron depensahan ug panalipdan ang soberanya sa nasod sa West Philippine Sea.
Nagtuo si De Lima nga ang paggamit sa plataporma sa UN usa ka importanteng lakang sa pagbatok sa mga pangangkon sa China.
Agig tubag niini, si DFA Secretary Ma. Theresa Lazaro namahayag nga wala ibaliwala sa DFA ang importansya sa nasangpit nga sugyot, apan sa pagkakaron, ang ilang gipunting mao ang kampanya sa Pilipinas nga mahimong non-permanent member sa United Nations Security Council (UNSC).
Gipasabot pa ni Secretary Lazaro nga sa higayon nga makalingkod na ang Pilipinas isip membro sa Security Council, mas molig-on ug mas gamhanan ang tingog sa nasud sulod sa UN, ug mas dali usab nato nga maasdang ug ma-promote ang mga isyu nga adunay dakong importansya sa nasud, lakip na ang isyu sa West Philippine Sea.
