CEBU CITY — Gihimakak sa Division Head sa Department of General Services nga si Lorenzo Basamot ang pasangil sa tulo ka mga babae nga trabahante sa Cebu City Hall ug sexual harassment batok kaniya.
Matod ni Basamot nga gisakyan lang og pamulitika ang pasangil sa mga babae human mi-file og affidavit batok kaniya.
Sigon pa usab ni Basamot, kinsang nangulo sa Records and Archives Management Division, posible nga adunay siyay naligsan nga empleyado sa city hall human nga, matud pa, iyang gi-komprontahan ang usa sa mga reklamante.
Base sa gidusong affidavit, gisaysay sa mga babayeng reklamante nga giingong mihalok si Basamot kanila ug gituohang nanghikap sa pribadong bahin sa lawas.
Dugang pa ni Basamot nga ‘add-on’ lang ang laing duha ka mga babayeng reklamante sa maong panghitabo ug sa pagguba sa iyang pagka-tao.
Andam usab nga mokanaog si Basamot sa iyang katungdanan kung mapamatud-an man ang maong akusasyon.
