Nakig-kooperar ang Department of Information and Communications Technology-7 sa mga kapulisan aron sa pagpakigsusi sa gituohang scam-hub operations nga gi-rumbo sa mga kapulisan nga nahimutang sa Brgy. Kasambagan sa dakbayan sa Sugbo niadtong adlawng Martes, Mayo 20, 2025.
Kini aron nga tabangan ang kapulisan alang paghatag ug kaalam mahitungod sa krimen sama sa online scamming pinaagi sa tabang sa Cybercrime Investigation and Coordinating Center (CICC) sa DICT-7.
Matud pa sa Regional Director sa DICT-7 nga si Frederick Amores, para kini sa pagsuporta sa imbestigasyon sa kapulisan sa maong kaso ug aron pag-asister sa mga kaso o reklamo mahitungod sa pagpangilad o scamming.
Gihimug-atan usab ni Amores, nga walay nadawat nga reklamo o mga ebidensiya ang buhatan sa DICT-7 gikan sa white hacker ug content creator nga si “MRWN” mahitungod sa gi-ingung scam hub operations.
Mipadayag usab sa kabalaka si Amores mahitungod sa pamaagi sa mao nga hacker sa pag-expose sa mga personal nga information ug mga hulagway sa mga nalambigit nga usa pud nga kalapasan sa Data Privacy Act ug Anti-Cybercrime Prevention Act.
Mipahimangno usab ang DICT-7 ngadto sa publiko sa paglikay sa bisan unsang matang sa pagpangilad sa online pinaagi sa “critical thinking” ug pagpanuki-duki sa mga impormasyon nga makita online. | Bombo Nathaniel Sandoval
