CENTRAL VISAYAS- Nagpahigayon ang DICT Central Visayas sa DICT Kapihan isip kabahin sa National ICT Month 2026 nga adunay temang “Isang Dekadang Digital: Konektado sa Puso at Serbisyo,” ubos sa pagpangulo ni DICT Central Visayas Regional Director Frederick Amores, ug OIC Assistant Regional Director Joshua Eleazar P. Domen.
Atol sa maong kalihokan, gipasiugda niini ang digital transformation, connectivity, cybersecurity, ug digital inclusion aron mapalapad ang access sa digital services ug mapalig-on ang mas episyente nga serbisyo publiko sa tibuok rehiyon.
Subay niini, gihatagan og gibug-aton Amores ang kamahinungdanon sa cybersecurity.
Diin siya mipahinomdom nga ang publiko angayan nga mag-amping sa pag-click og mga link nga dili kasaligan, ug likayan ang paggamit og dili luwas nga koneksyon, ilabi na sa public WiFi, aron malikayan ang cyber theft.
Giawhag usab niya ang mga netizen nga magpabiling mabinantayon ug responsable sa paggamit sa internet, isip kabahin sa pagpalig-on sa mas luwas ug mas seguradong digital nga palibot sa pagsaulog sa National ICT Month 2026.
