Gipadayag ni Interior Secretary Jonvic Remulla nga anaa sa Mindanao si Senador Ronald “Bato” Dela Rosa, diin giingong gipanalipdan siya sa usa ka impluwensiyadong grupo.
Matod ni Remulla, nagpadayon ang negosasyon tali sa mga awtoridad ug sa maong grupo nga giingong naghatag og dangpanan sa senador, aron malikayan ang posibleng dugoon nga komprontasyon atol sa pagpatuman sa warrant of arrest batok kaniya.
Gipasidaan usab sa kalihim nga ang posibleng panagsangka tali sa mga awtoridad ug sa grupo mahimong mosangpot sa dakong pagkawala sa kinabuhi, nga matod niya, mahimong moabot sa 10,000 ka tawo.
Una nang nagpahayag si Remulla sa iyang kabalaka nga mahimong mosangpot sa dugoon nga engkwentro ang pagpugos sa kapulisan sa pagsulod sa lugar diin gituohang nagtago ang senador.
Gidugang niya nga mas komplikado ang maong sitwasyon tungod kay si Dela Rosa usa ka kanhing hepe sa Philippine National Police (PNP).
Si Dela Rosa giingong giisyu-han og warrant of arrest sa International Criminal Court (ICC) may kalabotan sa mga alegasyon sa crimes against humanity, nga nalambigit sa iyang pagkapangulo sa PNP atol sa kampanya batok sa ilegal nga droga ubos sa administrasyon ni kanhi Presidente Rodrigo Duterte.
