CEBU CITY– Maayo nalang kay gibakwi na sa korte ang desisyon nga posibleng pagpagawas sa convicted rapist-killer nga si Calauan, Laguna ex-Mayor Antonio Sanchez gikan sa New Bilibid Prison sa bisa sa Good Conduct Time Allowance (GCTA).
Kini ang pamahayag ni Dr. Clarita Carlos, usa ka political analyst ug UP Diliman professor.
Sa ekslusibong pakighinabi sa Bombo Radyo Cebu kang Dr. Carlos giingon niini nga estudyante nila sa UP ang gi-rape ug gipatay nga si Eileen Sarmenta ug boyfriend niining si Allan Gomez niadtong June 28,1993. Ug kung ugaling wala bakwi-a ang maong desisyon, sigurado nga makigbisog ang tibuok UP batok niini.
Gihimug-atan sa professor nga dili lang ang UP ang magkahi-usa, inay lakip na ang tao nga nasuko sanglit brutal ang nahitabo sa mga nahimong biktima sa ex-mayor.
Gikwestyon usab ni Carlos ang giingong pagbinut-an ni Sanchez sulod sa bilangguan tungod kay daghan man kini og sala sama nalang niadtong nasakmitan kini og usa ka kilong shabu ug duna pay special treatment human madiskobre nga naa kini aircon ug flatscreen TV sulod sa iyang selda.
Hinungdan nga dili gyud angayang nga tagaan og kagawasan si Sanchez
“Poot na poot kami no sa mga nangyari na’to kasi estudyante namin itong si Allan at tsaka si Eileen na talagang ah… pagnabasa mo yo’ng ginawa sa kanila talagang mapopoot ka. Mabuti binawi nila yo’ng order na yan kasi kung hindi ay talagang mag-aalsa yung ano..hindi lang ang UP”
Samtang sa laing bahin, gitataw usab ni Carlos nga dili death penalty ang angay nga ipahamtang sa mga mihimo og heinous crimes. Mas maayong pasagdan nalang kining madugta ug mamatay sa prisohan. (FDP/SBR)
