CEBU CITY-Di mominos sa 201 ka mga barko ang narehistro ug gipaabot nga mosalmot sa fluvial procession sa 459th Fiesta Señor karong Enero 20, kini ang gipahibalo sa Philippine Coast Guard sa Central Visayas.
Ang maong gidaghanon gibase sa gidaghanon sa mga aplikasyon nga nadawat ug naaprobahan sa Coast Guard District Central Visayas.
Matud ni Commander Mark Larsen Mariano, deputy commander sa Coast Guard District Central Visayas, nga karong adlawa ang deadline sa ‘registration applications’.
Dugang pa ni Mariano nga posibleng modaghan pa ang gidaghanon sa mga mosalmot nga mga barko tungod kay ilang gipaabot nga mas daghang aplikante ang maaprobahan sa umaabot nga mga adlaw.
Matag tuig, daghang mga deboto ang mosalmot sa fluvial procession kay ang mga milagrosong imahe sa Señor Sto. Niño ug ang Our Lady of Guadalupe gidala sa usa ka sea procession subay sa Mactan Channel.
Sa unang higayon karong tuiga, mosalmot usab sa fluvial procession ang imahen ni San Jose.
Sa pikas bahin ang mga barko nga dili mahatagag permit dili tugotan nga makaapil sa fluvial procession.
Subay niini, Gipasidan-an sa Naval Forces Central, pinagi ni Lieutenant Bernabe Jay Zambale Jr. ang public affairs officer, nga mas pahugtan pa ang ilang seguridad hilabi na sa mga ‘unregistered vessels’.
Dugang pa, nga ang mga kapitan sa barko o operator sa mga dili rehistrado nga mga barko sa mga silot, kung mosupak sila sa regulasyon.
Ang mga kinahanglanon sa pagparehistro mao ang passenger ship safety certificate, certificate of public convenience, manning certificate nga adunay klarong kopya sa ID sa boat captain o operator.
