Gipanglantawan karon ni Cebu City Mayor-elect Nestor Archival ang pagpatuman sa Discipline Zone sa Barangay Banilad, Cebu City aron aduna nay katubagan ug solusyon ang baga nga trapiko nga kasamtangang gi-atubang sa nahisgutang dapit.
Sumala sa iyahang gibutayag atol sa iyahang pagpanumpa niadtong Mayo 30, 2025, hugot nga gidili na ang kalihokan sama sa pagpataka og parking sa mga sakyanan ug motorsiklo, ug usab pagliko-liko sa mga sakyanan, dili gikinahanglan na ang insaktong pag subay sa “right lane.”
Subay niana, tumong usab sa mayor-elect nga ablihan ang dalan dapit sa National Food Authority, ug apil na usab ang mga molabay sa duol sa overpass.
Samtang, giplanohang gidili na usab nga makasulod sa maong dapit ang mga “delivery riders” ug mga trucks, gikan sa alas 6:00 sa buntag, hangtud na sa alas 8:00 sa buntag. Kini tumong aron maminusan ang trapiko sulod sa naasoy nga oras.
Apan, nagkanayon usab si Archival nga sa dili pa hingpit nga ipatuman kining bag-ong lakang, aduna usa siyay pagahimuon nga mga konsultasyon, ug usab andam ug abli siya ugaling adunay mga sugyot nga mogawas kabahin niini.(Bombo Irene Ardiente)
