MANDAUE CITY-Gibarugan sa Office of the Ombudsman – Visayas ang desisyon niini sa pag-abswelto sa kasong administratiba ug kriminal nga giatubang ni Dismissed Mandaue City Mayor Jonas Cortes ug upat ka mga konsehalas sa dakbayan nga gipasaka ni Maria Priscilla S. Melendres.
Matod sa Ombudsman nga “premature” ang iyang reklamo sanglit napasakaan na siya og kasong sibil sa pagpanag-iya sa luna nga iyang gi-contest batok sa Mandaue City Government.
Dugang sa Ombudsman nga kinahanglang usang sulbaron una ang kaso.
Giklaro usab sa maong desisyon ang mga sakop sa Sangguniang Panlungsod nga sila si Mandaue City Councilors Maline Cortes Zafra, Oscar del Castillo, Jen Del Mar, ug Cynthia Remedio.
Kini nga resolusyon misunod sa Oct. 7 Supplemental Evaluator’s Report nga giaprobahan sa Ombudsman’s Central Office.
Ang reklamo naglakip sa mga alegasyon sa trespassing, violation of constitutional property rights, ug offenses ubos sa Anti-Graft and Corrupt Practices Act.
Gipasanginlan ni Melendres ang mga opisyal sa dakbayan sa ilegal nga pagsulod ug pag-angkon sa pagpanag-iya sa iyang luna, nga gikontrahan usab sa kagamhanang dakbayan sa Mandaue.
Sumala sa Supplemental Evaluator’s Report, ang nag-unang isyu kay anggilalisan nga pagpanag-iya sa maong luna.
Ang giaprobahan nga Supplemental Evaluator’s Report nga giaprobahan sa Ombudsman may kalabotan sa verified motion for reconsideration nga gisang-at ni Melendres kalabot sa iyang reklamo batok kang Cortes ug sa uban pa niadtong Sept 10.
Ang kaso naggumikan sa akto sa City Government sa pag-okupar sa 9.5 ka ektarya nga propyedad sa Zone Ahos sa Barangay Paknaan sa dakbayan sa Mandaue.
Dugang ni Melendres nga gipalit niya ang luna gikan sa iyang lola ug nagbayad siya og real property taxes sa City Government, nga makita sa tax declaration ubos sa iyang ngalan.
