Giaprobahan na sa House of Representatives sa ikaduhang pagbasa ang House Bill No. 9348, usa ka sugyot nga nagtinguha nga ibalik ang diborsyo sa nasud isip paagi sa pagbungkag sa kaminyuon.
Atol sa plenary session, ang proposal giaprobahan pinaagi sa viva voce o voice voting.
Ang balaudnon naaprobahan duha ka buwan human kini gi-refer sa plenaryo sa House committee on population and family relations.
Sa dihang nangutana si Tingog Partylist Representative Jude Acidre kon ang absolute divorce alang sa mga magtiayon nga dili na malipayon sa ilang kaminyoon apan, gitubag kini ni Albay 1st District Representative Edcel Lagman, kinsang nagpasiugda sa maong balaudnon nga dili lang sa dili na malipayon kondili ang anaa na usab sa distressful nga sitwasyon.
Dugang pa niini nga ang maong balaud kay pro-woman measure tungod kay kadaghanan sa mga kaso, ang asawa mao ang biktima sa usa ka pakyas ug makahilo nga kaminyoon, sama pananglitan sa pag-abuso, pagluib sa kaminyoon, ug pagbiya sa kaminyoon.
Gihimug-atan usab sa opisyal nga ang tumong sa maong sugyot arun makalingkawas sa kasakit ug sa sayop nga tawo.
Lakip sa mga sukaranan sa diborsyo nga gitumbok sa balaudnon mao ang physical violence o grabeng abusadong binuhatan nga gitumong batok sa petitioner, usa ka common child o anak sa petitioner; pisikal nga kapintasan o moral nga pagpit-os aron pugson ang nagpetisyon sa pag-usab sa relihiyon o political affiliation; pagkaadik sa drogas o dili na mapugngan nga ilimnong makahubog o kanunay nga sugal; ug homosexuality.
