Gipahinumduman sa usa ka Doctora ang katawhang Cebuano nga gustong mosalmot sa “Dugong Bombo: A Little Pain, A Life to Gain” sa ilang gikinahanglan nga buhaton aron mahimong kwalipikado sa pag-donar og dugo.
Sa pakighinabi sa Bombo News Team, si Dr. Amira Rondina Maslamama, Blood Bank Manager sa Philippine Red Cross-Cebu Chapter, mitutok sa kamahinungdanon sa nga kondisyon sa lawas sa dili pa mo-donar.
Iyang gitumbok, nga kinahanglan adunay timbang nga dili moubos sa 50 kilos, nakatulog og 6-8 ka oras ug naka-kaon og insakto.
Gipasabot usab sa doctora nga bisan ang mga nag-maintenance og tambal, mamahimo gihapon nga mo-donar apan kinahanglan rang i-assess sa mga medical staff.
Lakip sa gi-highlight ni Dr. Maslamama, mamahimo gihapon nga maka-apil ang mga adunay tattoo, basta kay lapas na og usa ka tuig, ingon man ang nakadawat og anti-rabies vaccine.
Gipasabot usab niya nga ang mga kababayen-an nga adunay menstruation mamahimo gihapon nga makadonate, basta taas ug normal ang ilang hemoglobin level.
Gidili usab ang pag-inom og ilimnong makahubog ug ang pagpang-ehersisyo sulod sa 24 ka oras sa wala pa mag-donar og dugo.
Subay sa hustong paagi sa pag-donar og dugo, gipasabot sa doctora nga ang donor kinahanglan nga mopahuway sulod sa pipila ka minutos human sa paghatag og dugo, mag-inom ug igo nga tubig aron mabalik ang fluid nga nawala, ug likayan ang bug-at nga kalihukan sama sa pagpang-alsa og butang sulod sa 24 ka oras.
Gidugang pa niya nga ang sakto nga proseso mao ang screening ug medical check-up, dayon ang aktwal nga pagkuha sa dugo nga molungtad og 10 hangtod 15 minutos.
Human niini, tagaan og snacks ug beverages aron malikayan ang pagkalipong ug aron mabawi ang kusog sa donor.
