Gitugyan sa Department of Energy (DOE) ang tulo sa ilang Mobile Energy System (MES) units ngadto sa Armed Forces of the Philippines (AFP) aron palig-onon ang pagpangandam sa militar alang sa mga bulnerableng lugar.
Matod ni DOE Undersecretary Felix William B. Fuentebella, ang MES usa ka “force multiplier” nga nagtabang sa mga frontliners ug nagtubag sa panawagan sa Presidente alang sa usa ka lig-on ug luwas nga suplay sa enerhiya.
Ang matag MES nahimutang sa usa ka 20-foot trailer, nga adunay 9.18 kilowatt-peak solar panels, 60 kilovolt-ampere hybrid inverter, ug 102.4 kilowatt-hour battery storage, nga makahatag og kuryente sa command centers, ospital, ug uban pang kritikal nga mga pasilidad panahon sa mga emerhensya.
Ang mga yunit kaniadto gipakatap sa mga lugar nga naigo sa bagyo sa Cagayan ug sa hilit nga mga isla sa Pag-asa ug Balabac sa Palawan.
Ang proyekto usa ka kolaborasyon tali sa USAID Energy Secure Philippines ug Hawaii Natural Energy Institute (HNEI) isip kabahin sa nagpadayon nga kooperasyon tali sa DOE ug AFP sa pagpalig-on sa energy resiliency sa nasud.
