Gipaspasan sa Department of Energy (DOE) ang pagpatuman sa 22 ka renewable energy projects isip tubag sa hulga sa krisis sa lana ug aron mapalambo ang alternatibong tinubdan sa kuryente sa nasod.
Sumala ni Usec. Claire Castro sa Presidential Communications Office, tumong sa gobyerno nga mapakunhod ang pagsalig sa imported nga lana, nga kanunay maapektuhan sa pagsaka sa presyo sa merkado sa kalibutan.
Sa usa ka press briefing sa Iloilo City, giingon ni Castro nga lakip sa mga proyekto nga gipadali sa DOE mao ang 12 ka solar, 6 ka hydroelectric, 2 ka biomass, 1 ka wind project, ug 1 ka integrated renewable energy storage system.
Gipasiugda nga kini nga mga proyekto importante kaayo ilabi na sa panahon sa krisis sa lana, diin ang pag-usab-usab sa presyo sa mga produktong petrolyo nakaapekto sa suplay sa kuryente ug sa gasto sa mga konsumidor.
Pinaagi sa pagpalapad sa renewable energy, gilauman sa gobyerno nga makab-ot ang mas lig-on, mas barato, ug mas limpyo nga suplay sa enerhiya sa nasod.
Dugang pa, tumong usab niini nga mapanalipdan ang ekonomiya batok sa mga epekto sa krisis sa lana sa kalibutan.
