Masaligon ang Department of Energy (DOE) nga igo ang suplay sa kuryente sunod tuig, dungan sa 2025 midterm elections.
Atol sa pagdungog sa Senate Committee on Energy, gipangutana ni Committee chairman Senador Raffy Tulfo ang ahensya kon makasiguro ba ang katawhan nga wala’y brownout nga masinati sa sunod tuig.
Matod ni energy USec. Rowena Guevarra, sa mga kasamtangang planta sa nasud, gipaabot nga mosobra sa 4000 megawatts nga suplay sa kuryente ang moabot sunod tuig.
Dugang pa niini nga kapin sa dos mil ang conventional power supply samtang kapin sa 1900 ang renewable sources.
Ingon man nga mipasalig usab kini nga hugot ang ilang pagbantay sa planta nga mosulod karong tuiga.
Suportado usab sila sa ahensya sa pagkuha sa gikinahanglang permits ug lisensya aron walay rason nga dili sila maka-operate subay sa petsa nga ilang gisaad.
