Gi-activate sa Department of Energy (DOE) ang mga emergency protocol niini sa sektor sa enerhiya human sa pag-abot sa Bagyong Tino aron mapreserbar ang suplay sa kuryente ug gasolina ug maminusan ang pagkabalda sa mga apektadong komunidad.
Sumala sa DOE, ang Task Force on Energy Resiliency sa ahensya anaa na karon ug nakig-alayon usab sila sa National Inter-Agency Coordinating Cell aron mabantayan ang epekto sa bagyo ug mapadali ang mga operasyon sa pagbangon.
Matod ni Undersecretary Felix William Fuentebella, Chair sa Task Force, nga ang ilang prayoridad mao ang kaluwasan ug kaayohan sa komunidad.
Sa sayo pa, ang opisyal miingon nga nakig-alayon sila sa mga power generator, transmission provider, distribution utilities, electric cooperatives, ug fuel suppliers aron maandam alang sa bagyo ug alang sa hinanaling pagpahiuli sa serbisyo kung ugaling moigo ang bagyo sa mga apektadong lugar.
Samtang, ang National Grid Corporation of the Philippines (NGCP) nag-andam usab og mga repair crew ingon man pagmentinar sa mga linya sa komunikasyon, samtang ang mga electric cooperatives naglimpyo sa mga potensyal nga peligro sa mga linya sa kuryente.
Dugang pa, ang mga planta sa diesel power sa NPC-SPUG sa Bohol andam na usab human sa precautionary evacuation sa lokal nga gobyerno.
Gitun-an usab sa DOE ang mga fuel supply chain, nga mag-prioritize sa access para sa mga emergency services ug mga kritikal nga pasilidad.
Gitambagan usab ang mga residente nga mag-andam sa mga emergency essentials, ipadayon ang pag-charge sa ilang mga telepono, ug ang impormasyon sa hotline sa ilang power provider.
