Hugot nga gimandoan sa Department of Energy (DOE) ang tanang kompanya sa lana ug mga gasolinahan nga mosunod sa kasamtangang mga lagda sa pagpresyo sa gasolina aron malikayan ang hoarding ug bisan unsang wala gitugot nga pagtaas sa presyo sa mga produktong petrolyo taliwala sa nagsingabot nga pagtaas sa presyo sa lana tungod sa epekto sa kagubot sa Middle East.
Kini subay sa direktiba ni Presidente Ferdinand R. Marcos Jr., diin gipakusog usab ang pagmonitor uban sa tabang sa Department of the Interior and Local Government ug sa Philippine National Police.
Sumala sa DOE, padayon nilang gimonitor ang paglihok sa presyo sa mga gasolinahan aron masiguro nga ang mga motorista ug mga konsumidor dili maabusohan.
Samtang, ania ang kasamtangang mga range sa presyo sa mga produktong petrolyo gikan Marso 6 hangtod Marso 9:
-Gasoline RON 97/100: ₱53.70 – ₱76.50/L
-Gasoline RON 95: ₱50.00 – ₱71.04/L
-Gasoline RON 91: ₱49.00 – ₱64.70/L
-Diesel: ₱49.00 – ₱66.59/L
-Diesel Plus: ₱56.80 – ₱74.81/L
-Kerosene: ₱78.90 – ₱99.89/L
Ang DOE nagpahinumdom nga ang pagtipig ug ilegal nga pagbaligya sa petrolyo hugot nga gidili ubos sa National Law No. 33 nga gi-amyenda sa Presidential Decree 1865.
Bisan kinsa nga molapas sa balaod mahimong mapahamtangan og angay nga silot ug pagkansela sa ilang operating permit.
