CEBU CITY — Nakita sa Department of Health (DOH)-7 nga adunay dakong epekto ang striktong pagpatuman sa mga minimum health standards hinungdan nga mikunhod ang mga kaso sa COVID-19 sa dakbayan sa Sugbo.
Kini human nga gikalipay sa ahensya ang makanunayon ang pag-ubos sa mga natalang kaso sa COVID-19 sulod na sa 19 ka adlaw diin pulos kini mga double-digits.
Matud sa tigpamaba ug Chief Pathologist sa DOH-7 nga si Dr. Mary Jean Lorreche nga displinado ang mga Sugbuanon sa gipatuman nga mga protocols sanglit nasayud na man sila sa unsay angayang buhaton batok sa coronavirus.
Dason pa sa tigpamaba nga epektibo ang gipatumang localized lockdown sa mga barangay gumikan kay daling nakontrolar ang kagaw sulod sa lugar.
Gibutyag usab ni Lorreche nga nagkaubos ang mga natalang kaso sa COVID-19 sa Sugbo apan dili pa makaingon ang ahensya kung na-flatten the curve na ba kini.
Gitataw usab niini nga nagpabiling functionable ang mga laboratoryo sa Sugbo alang sa pag-administer sa RT-PCR tests.
Gikalipay usab sa ahensya ang kahimtang sa mga tambalanan gumikan kay dili na kaayo puno ug maka-accomodate pa og dugang pang mga pasyente gumikan sa ubay-ubay na nga mga recoveries. /GN
