CENTRAL VISAYAS-Subling giawhag sa buhatan sa Department of Health Central Visayas (DOH-7) ang publiko nga sundon ang mandato sa ilang mga LGU sa paggamit og pabuto karong umaabot nga Bag-ong Tuig.
Kini nunot sa pagsaka sa ihap nga natala sa firework-related injuries atol sa pagsaulog sa Pasko diin niabot na ngadto sa 43 ang kaso gikan sa Disyembre 22 hangtod sa alas 6 sa buntag kagahapong adlawa, Disyembre 25.
Hinungdan nga nanghinaot si DOH-7 Director Jaime Bernadas nga kung mahimo likayan sa mga tawo ang paggamit og pabuto ilabi na nga nagdala kini peligro og panglawas sa katawhan particular na sa mga tiguwang.
Inay imbes magpasiga og pabuto kay mopalit nalang og mga alternatibong makasaba sama sa tambol ug busina aron sa pagsaulog.
Gisubli usab niini nga gidili ang pagpamaligya og pabuto sa mga menor de edad.
Hinuon, dako ang pasalamat sa opisyal sa DOH 7 sa mga local government units ug sa mga police personnel sa padayong pagpatuman sa hugot nga pagbantay ilabina sa pag-regulate sa paggamit og pabuto.
Dako usab og natabang ang regulasyon sa kagamhanan sa dakbayan sa Sugbo sa paggamit ug pagpamaligya og pabuto pinaagi sa executive order nga giluwat ni Mayor Raymond Alvin Garcia.
Diin nanghinaot usab kini nga walay makalusot sa mga tindahan ilabi na kadtong hingpit nga gidili sama sa ‘goodbye Philippines’ ug ang publiko makalaom nga mas pahugtan pa sa kapolisan sa dakbayan ang ilang seguridad aron mamintinar ang kahapsay ug luwas nga pagsugat sa bag-ong tuig.
