Gikumpirma sa Department of Health (DOH) nga adunay gamay nga pagsaka sa kaso sa measles-rubella sa nasud sa unang semana sa Mayo.
Sa datos nga gipagawas sa ahensya, niabot na sa 2,118 ka mga kaso sa measles-rubella ang natala sugod niadtong Mayo 10 ning kasamtangang tuiga.
Mas taas kini nga ihap kon itandi sa ihap sa mga kaso nga natala sa samang panahon sa miaging tuig nga niabot lang sa 2,068 ka kaso.
Nag-una gihapon ang National Capital Region nga adunay labing daghang kaso sa measles-rubella.
Gisundan kini sa Calabarzon, Mimaropa, Central Luzon, ug Zamboanga Peninsula.
Gihangop usab sa DOH nga ang pagkunhod sa fatality rate ngadto lamang sa 0.42 percent nga mas ubos sa 0.46 fatality rate sa miaging tuig.
Agig tubag, matod ni Health Secretary Ted Herbosa, magpadayon sila sa paghimo og mga bakuna aron makontrol ang pagdaghan sa kaso sa measles-rubella.
Base sa datus sa DOH, dul-an sa 65% lang sa mga bata ang nabakunahan sa miaging tuig ug ilang gitarget nga malabwan pa kini nga numero karong tuiga.
Partikular nga gipunting sa ahensya ang mga bata nga ubos sa usa ka tuig ang edad.
