CENTRAL VISAYAS-Nakatala ug bag-o nga 3,765 ka kaso sa dengue fever ang Central Visayas, nga mas ubos ug 63 porsiyento sa datos nga natala niadtong 2022, matod sa usa ka opisyal.
Matud pa ni Dr. Ronald Jarvic Buscato, regional program manager sa Department of Health-Central Visayas Communicable Diseases Section, nga base sa DOH Dengue Surveillance Report, mas ubos ang 3,765 ka kaso sa dengue ug 15 ang namatay gikan sa Enero 1 hangtod Hulyo 15 kon itandi sa 10,063 ka kaso ug 61 ang namatay nga natala sa miaging tuig.
Dugang pa niya nga parehong lalaki ug babaye ang apektado sa dengue, apan ang labing apektado nga grupo sa edad mao ang 21 anyos pataas.
Sa maong gidaghanon sa mga kaso nag-una ang Cebu City nga adunay 383, gisundan sa Talisay City nga adunay 293, Lapu-Lapu City nga adunay 237, Mandaue City nga adunay 164, ug Minglanilla Cebu nga adunay 132.
Bisan pa sa pagkunhod sa ihap sa mga kaso, ang dengue outbreaks mahimo gihapon nga mahitabo tungod sa dili managsama ug dili matag-an nga kahimtang sa panahon.
Hinungdan nga gidasig ug gipahinumdoman ni Buscato ang publiko nga iapil ug ipadayon ang pagpraktis sa 5S Strategy, nga nagpasabot sa Search and destroy breeding places, Seek early consultation, Self-protection measures, Say yes to fogging, ug Sustain hydration aron malikayan ang dengue fever nga motungha o mahimong grabe.
Lakip sa 5S Strategies, gipasiugda ni Buscato ang esensya sa pagtipig sa mga suplay sa tubig ug paglimpyo sa palibot sa tukma ug makanunayon nga paagi, nga giingon nga kini ang labing maayo nga paagi aron malikayan ang sakit nga dengue, ilabi na karon nga ang mga lugar nga breeding sa mga lamok wala na sa mga eskuylahan apan sa mga panimalay.
