Nipasalig ang Department of Health (DOH) nga ang mga pasyente dili na kinahanglang mobayad sa basic accommodations sa mga tambalanan sa DOH.
Kini subay sa direktiba ni Presidente Ferdinand Marcos Jr. sa iyang ikaupat nga State of the Nation Address (SONA).
Diin gipahibalo sa Presidente ang pagpatuman sa zero-balance billing aron mapagaan ang pinansyal nga palas-anon sa mga pasyente nga nanginahanglan og medikal nga pag-atiman.
Gidugang usab ni Marcos nga ang basic accommodation services sa DOH hospitals libre na, busa ang mga pasyente wala nay bayranan.
Kini human nga gipunduhan ang medical assistance sa Medical Assistance to Indigent and Financially Incapacitated Patients (MAIFP), Philippine Charity Sweepstakes Office (PCSO), Philippine Amusement and Gaming Corp. (Pagcor), ug DOH allocation funds.
Dugang kini sa suportang pinansyal gikan sa Philippine Health Insurance Corporation (PhilHealth).
Gikompirmar usab sa DOH nga isip dugang ayuda sa mga pasyente nga kinahanglang mobayad sa ilang bayronon sa ospital, ang pagproseso sa Medical Assistance to Indigent and Financially Incapacitated Patients (MAIFP) program ilakip usab sa e-Gov application.
Kini mao ang paghimo sa medikal nga tabang nga mas hiniusang, paspas, transparent ug accessible sa panahon sa panginahanglan sa mga pasyente.
Sa post-State of the Nation Address (SONA) forum sa mga opisyal sa ahensya sa gobyerno, giklaro ni Health Secretary Ted Herbosa nga libre na ang basic accommodation sa tanan basta naa sa mga tambalanan sa DOH apan kon sa pribadong tambalanan dunay bayad.
Matod sa kalihim, kaniadto mga indigent o 4Ps members lang ang nasakop sa zero balance billing. Si Sec. Gipasigarbo usab ni Herbosa nga 40 sa 83 ka mga tambalanan sa DOH aduna nay air-conditioned nga mga ward.
