Nagplano karon ang Department of Health (DOH) nga magdeklarar og national public health emergency tungod sa pagsaka sa human immunodeficiency virus infections o HIV.
Matod ni DOH Secretary Ted Herbosa, niabot sa 500 porsiyento ang pagsaka sa HIV infections sa mga tawo nga nag-edad og 15 ngadto sa 25.
Makapaalarma kini ilabina tungod kay ang pinakabata nga natala nga kaso mao ang 12-anyos nga batang babaye nga taga Palawan nga nataptan sa virus pinaagi sa pakighilawas.
Dugang pa sa kalihim nga ang Pilipinas ang adunay pinakadaghang kaso sa Western Pacific Region ug ang gikabalak-an kay kadaghanan sa mga biktima mga batan-on.
Gipasidan-an sa kalihim nga kung dili mohimo og lakang ang gobyerno, ang ihap sa mga kaso sa tibuuk nasud mahimong moabot sa 400,000.
Usa sa nakita sa DOH sa pagdaghan sa kaso sa HIV mao ang pagdaghan sa paggamit sa social media ug dating apps.
Gani, sa Central Visayas kay nakatala og 225 ka bag-ong kaso sa HIV sa unang quarter sa 2025, nga nagbutang niini sa nag-unang unom ka rehiyon nga adunay pinakataas nga ihap sa mga impeksyon sa tibuok nasud.
Diin sa datos, mas daghang batan-on sa dakbayan sa Sugbo ang na-diagnose nga adunay HIV.
Matod ni Dr. Kimberly Mae Sanchez, ang Cebu City Health, Department Social Hygiene Physician, ang mga healthcare worker nakatala og di mominos 63 ka tawo nga adunay HIV (PLHIV) sa dakbayan niadtong Marso lamang.
Dugang niya nga gawas sa padayong pagsaka sa bag-ong kaso, ang mga opisyal sa panglawas sa dakbayan sa Sugbo nipadayag og kabalaka sa pagtumaw sa lain nasab nga kabalaka.
