Gibasura sa Department of Justice ang tulo ka kaso sa excise tax sa magtiayong kontraktor nga sila si Sarah ug Curlee Discaya tungod kay sila mga konsumidor o buyers lang sa mga imported nga sakyanan ug dili ang tinuod nga importer.
Kini ang gipaambit sa tigpamaba sa departamento nga si Atty. Polo Martinez, diin gipasabot niini nga ang magtiayon dili manubag sa tulo ka reklamo nga gisang-at sa Bureau of Internal Revenue tungod sa wala mabayri nga excise tax sa ilang mga imported nga sakyanan.
Ang tulo ka kaso naglambigit sa unom ka sakyanan nga narehistro ubos sa ngalan sa magtiayon ug sa ilang kompanya, ang St. Gerrard Construction: 2 ka Land Rover Range Rovers, usa ka Cadillac Escalade, 2 ka Mercedes Benzes ug usa ka Dodge Ram Rebel.
Matud ni Martinez nga ang excise tax ubos sa balaod mao ang bayran sa importer, apan nakita sa panel nga dili importer sila si Sarah ug Curlee busa dili sila ang angay manubag sa wala pagbayad sa excise taxes.
Samtang, ang duha ka kaso sa buhis batok sa mga Discaya nga gipahibalo sa DOJ wala pa mapasaka sa Court of Tax Appeals.
Samtang, nakaplagan sa panel sa mga piskal sa DOJ nga gitago sa magtiayon ang ilang tinuod nga kita sa ilang 2020 ug 2021 Income Tax Returns.
