Giklaro sa Department of Justice ang desisyon sa Court of Appeals sa hukom batok kang Leila De Lima kalabot sa kasong iyang giatubang nga naglambigit sa ilegal nga drugas.
Diin, gihimakak sa nasangpit nga departamento ang giingong pagbalit-ad sa acquittal nga hukom ni kanhi Senador ug karon incoming Congresswoman Leila De Lima.
Nagtuo ang Department of Justice (DOJ) nga walay mausab dinhi ug niingon pa nga posibleng magpabilin ang ‘acquittal’ nga desisyon sa korte pabor kang Congresswoman-elect De Lima.
Mao gyud kini ang gipaambit ni Justice Assistant Secretary ug Spokesperson Mico Clavano kalabot sa bag-ong lakang nga gihimo sa Court of Appeals karong bag-o lang.
Sa laing bahin, gipasabot sa tigpamaba nga dili si kanhi Senador Leila De Lima ang gitutokan sa petisyon nga gisang-at sa Court of Appeals.
Matod niya nga ang petition for certiorari mao ang pagpasabot sa Regional Trial Court Branch 204 sa Muntinlupa nganong naabsuwelto ang kanhi senador sa iyang kaso nga naglambigit sa ilegal nga drugas.
Nalatid sa ilang dokumento o desisyon nga adunay grave abuse of discretion sa habig sa ubos nga korte nunot sa pagdumala niini sa kaso.
Hinungdan nga subling giklaro ni Justice Assistant Secretary Mico Clavano nga wala’y labot ang merito sa kaso ni kanhi senador Leila De Lima apan mas labaw pa kini sa nahisgutang regional trial court.
Siya niinsistir nga ang Muntinlupa Regional Trial Court Branch 204 maoy gikuwestiyon dinhi, diin, ang Court of Appeals naningkamot sa pagpasabot o pagtino kon tinuod ba nga nakahimo kini og grave abuse of discretion sa pagdumala sa kaso.(Bombo Irene Ardiente)
