Gipasabot sa Department of Justice (DOJ) ang pagkasikop nila ni Sheila Guo ug Cassandra Ong human sila niabot sa Pilipinas human nasikop didto sa Indonesia.
Matod ni Justice USec. Nicholas Ty, gidakop sa Bureau of Immigration (BI) si Sheila Guo, kinsa igsuon ni dismissed ex-Bamban, Tarlac Mayor Alice Guo, tungod sa paglapas niini sa Immigration Act tungod sa iyang illegal exit sa nasud ug wala moagi sa saktong proseso ingon man pagkuha og Philippine passport bisan pa sa kuwestiyonableng nasyonalidad niini.
Samtang ang negusyante nga si Cassandra Ong nga nalambigit sa POGO hub operation sa Porac, Pampanga, nasikop sab nga walay warrant of arrest tungod sa nagkadaiyang krimen nga gipasaka batok kaniya sa National Bureau of Investigation (NBI) lakip na ang obstruction of justice, kalapasan sa passport act ug criminal provision of the Immigration Act.
Bisan pa niini, siya miingon nga sila si Ong ug Guo mahimo gihapong makapangayo og piyansa sa nagkadaiyang giatubang nga kaso.
Matod niya nga dili pa ingon ana kalig-on ang mga reklamo batok kang Ong, apan mas bug-at pa nga kaso ang gikatakdang ipasaka batok kaniya sa tukmang panahon.
Dugang pa sa opisyal nga limitado sa pagkakaron ang mahimong ipasaka batok kang Ong tungod kay warrantless arrest kini.
Sa laing bahin, suportado usab kini ni NBI Director Jaime Santiago ug nagkanayon nga sila si Guo ug Ong mahimong makapiyansa alang sa obstruction of justice.
Samtang ang DOJ nakig-alayon na sa House of Representatives ug sa Senado aron maseguro nga makostudiya sa gobyerno si Ong.
Kahinumduman nga ang duha nasikop sa mga awtoridad sa Indonesia niadtong, Agosto 22 sa Batam samtang gisubay karon si Alice Guo ug ang igsuon niini nga si Wesley Guo.
