Subling gibarugan sa Department of Justice nga wala pa sila makadawat og warrant of arrest batok kang Sen. Bato Dela Rosa gikan sa International Criminal Court.
Sumala ni Prosecutor General Richard Anthony Fadullon, wala pa silay nakitang opisyal nga kopya sa maong dokumento.
Kini bisan pa sa pamahayag sa kanhi Presidential Spokesperson nga si Atty. Harry Roque nga daw nakadawat na sila og warrant batok sa magbabalaod.
Busa, atol sa press conference, kusganon niyang gipahayag ang baruganan sa departamento nga wala pa gihapon sila makakita o makadawat og kopya sa maong dokumento.
Ingon man nga moagi una sa Department of Foreign Affairs ug sa Philippine Center on Transnational Crime sa dili pa kini ipahibalo sa Department of Justice.
Mahinumduman nga gibutyag ni Ombudsman Jesus Crispin ‘Boying’ Remulla nga ang International Tribunal nag-isyu og warrant of arrest batok kang Sen. Dela Rosa ning bag-ohay lang.
