Temporaryo nga gipahunong sa Department of Labor and Employment Region VII ang installation and repair operations sa tulo ka mga dagkong telecommunication companies ug internet providers sa syudad sa Sugbo human nasuta nga nakalapas sila sa Occupational safety and Health Standards sa gipahigayon nga inspeksyon sa DOLE VII.
Matud ni DOLE-VII Director, Atty. Roy Buenafe nga ang mga telco ug mga internet service providers nakadala og peligro dili lamang sa ilang mga personnel kundili lakip na usab sa mga tawo nga moagi tungod sa ilang gi trabaho nga linya.
Gipasabot ni Buenafe nga gawas sa mga magbitay ug naglambod nga mga kable sa internet ug kuryente, nasuta usab nga walay safety officers, certified first aiders, hazard identification ug risk assessment controls, ingon man uban pang gikinahanglang OSH personnel.
Gidugang usab ni Buenafe ang dugay na kaayo nga problema sa mga nagbitay nga mga kable sa kuryente og internet diin pila na ka mga disgrasya ang nahitabo sama sa kadtong mga nabiktima gumikan sa pagbitik sa wire, nakuryentihan ug uban pa.
Tungod niini, gimandoan sa Work Stoppage Orders ang mga establisemento nga undangon dayon ang installation activities, pole climbing, elevated works, cable laying, overhead line operations, ug uban pang field activities hangtod nga masulbad ang tanang kakulangan ug masiguro ang hingpit nga pagsunod sa Occupational Safety and Health Standards.
Samtang epektibo pa ang WSO, giklaro usab ni Atty. Buenafe nga gikinahanglang dili maputol ang pagsweldo sa mga apektadong mga trabahante sa nahisgutang mga kumpaniya.
Gikatakda sab nga ipatawag ang kadagkuan sa tulo ka mga kompaniya sa sunod semana alang sa ipahigayon nga hearing sa DOLE-VII.
