CENTRAL VISAYAS- Nag-andam og nagkalain-laing interbensyon ang Department of Labor and Employment (DOLE)-7 alang sa mga trabahante nga posibleng mawad-an og trabaho tungod sa pagkunhod sa operasyon sa pipila ka export-oriented companies sa mga economic zone sa rehiyon.
Matud ni DOLE-7 Regional Director Atty. Roy Buenafe, ilang namatikdan ang pagkunhod sa gidaghanon sa mga trabahante sa pipila ka kompanya nga nag-eksport og seafood ug uban pang produkto ngadto sa Estados Unidos ug Europa tungod sa pagkunhod sa mga order ug kausaban sa panginahanglan sa merkado.
Gipasabot ni Buenafe nga kadaghanan sa naapektuhang mga trabahante gikan sa mga manpower agency ug wala direktang gitangtang sa mga kompanya.
Gidugang niini, nga aron matabangan sila, adunay nagkalain-laing programa ang DOLE lakip na ang pagtabang sa redeployment sa mga trabahante ngadto sa ubang kompanya aron dili sila magpabiling walay trabaho.
Maghatag usab ang ahensya og skills training ug retraining aron madugangan ang ilang kahibalo ug kwalipikasyon alang sa ubang oportunidad sa trabaho.
Dugang pa, mahimong maka-avail ang mga naapektuhang trabahante sa Temporary Employment Program sa gobyerno isip panabang sa ilang panginabuhian samtang nangita pa og permanente nga trabaho.
Gipasalig ni Buenafe nga magpadayon ang DOLE sa paghatag og tanang posibleng suporta ug asistensya aron matabangan ang mga trabahante ug ilang pamilya nga maagian ang epekto sa maong sitwasyon.
