CEBU CITY — Andam ang Department of Labor and Employment (DOLE) sa paghatag og tabang ngadto sa duha ka mga Sugbuanong seafarers nga na-rescue sa naunlod nga barkong Gulf Livestock 1 sa kadagatan sa Japan.
Matud ni DOLE Secretary Silvestre Bello III nga padayon kining nakig-alayon ngadto sa mga kabanay sa crew members alang sa pagtabang, ingon man ang update sa nagpadayong search and rescue operation sa naunlod nga barko.
“We are in touch with the next of kin of the crew and we are providing them all the help we can give, including the latest information on the search and rescue operation for our kababayans being done by Japanese authorities,” sigon pa ni Bello.
Giila ang ikaduhang survivor nga si Jay-Nel Rosales, 30-anyos ug nagpuyo sa Sugbo diin nakaplagan kining naglutaw-lutaw sa kadagatan ug narescue sa patrol boat.
Nagpaalim sa tambalanan ang deck crew nga si Rosales ug nangumusta na kini sa iyang mga kabanay sa Sugbo.
Samtang ipaubos sa kwarantina sa usa ka hotel ang na-rescue nga chief officer nga si Eduardo Sareno, kinsang nagpuyo sa Oslob, Cebu, ug gihatagan na kini og mobile phone aron makapangumusta sa iyang pamilya sa Sugbo.
Mipasalig usab ang DOLE nga mahatagan og benepisyo ang mga kabanay niini sanglit nahimo silang myembro sa Overseas Workers Welfare Administration kon OWWA. /gn
