CEBU – Gimandoan na sa Department of Tourism ang lokal nga kagamhanan sa Panglao, probinsiya sa Bohol, sa pag-imbestigar sa giingong ‘overpriced’ nga mga pagkaon sa Virgin Island.
Gipahibalo ni DOT Usec. Atty Elaine Mae Bathan, nga gi-seryoso ni DOT Secretary Christina Frasco ang maong isyu diin importante ang tourism industry karun sa pagrekober sa ekonomiya sa nasud human nga mitibugsok gumikan sa pandemya.
Gawas sa LGU sa Panglao, giingong nakig-alayon na usab ni Sec. Frasco sa DTI ug DILG alang sa imbestigasyon sa maong isyu.
Subay usab niini, gitataw usab ni Panglao Mayor Eduardo Arcay, nga temporaryo na nila karun nga gipasirad-an ang Virgin Island samtang nagdagan ang imbestigasyon.
Matud sa mayor nga adunay 16 ka mga stalls sa naasoy nga tourist destination ang masirad-an ug ibalhin una kini sila sa mainland sa ilahang night market.
Giangkon usab sa opisyal nga walay permit ang maong mga vendors.
