Gipasalig ni Department of Public Works and Highways (DPWH) Secretary Vice Dizon nga ang tanang kurakot nga opisyal sa Bulacan 1st district engineering office manubag, kinsa giingon sa kalihim nga sa dili madugay mapasakaan og kaso.
Gihimo ni Sec. Dizon ang pamahayag atol sa iyang miting uban sa mga bag-ong gitudlo nga opisyal sa Malolos, Bulacan karong adlawa.
Ang miting gipahigayon sa usa ka conference room nga gitawag ni Dizon nga “infamous room” diin nahimutang ang lamesa diin gibutang ang P300 milyon nga giingong gipaambit sa kanhing mga district engineer sa DPWH nga sila si Henry Alcantara ug Brice Hernandez.
Sumala sa kalihim, ang maong lugar simboliko tungod kay dinhi miulbo ang dakong eskandalo sa mga proyekto sa pagkontrol sa baha.
Misaad usab ang kalihim nga maglatid og mga solusyon uban sa mga bag-ong gitudlo nga opisyal sa maong district engineering office sa DPWH sa Bulacan.
Samtang, gikatakda usab nga susihon ni Sec. Dizon ang mga anomalosong proyekto nga gidumala sa Bulacan 1st district engineering office.
