Gikatakdang mopagawas og listahan sa mga ghost ug substandard nga mga proyekto sa nagkadaiyang dapit sa nasod ang buhatan sa Department of Public Works and Highways (DPWH).
Matod ni DPWH Sec. Vince Dizon, apil sa listahan ang mga ngalan sa mga kontraktor sa matag proyekto, mga ngalan sa mga magbabalaod o opisyal sa publiko nga maoy proponent, ug mga empleyado o opisyal sa DPWH nga mipirma sa nahisgutang mga proyekto.
Matod ni Dizon, gi-finalize na sa DPWH ang nasangpit nga listahan ug plano sa ahensya nga ilusad kini human sa pipila ka semana diin gitumong kini nga maablihan online diin ma-access sa publiko ang tibuok listahan.
Gipasabot sa kalihim nga ang nasangpit nga lakang kabahin sa tinguha niini nga maablihan sa publiko ang mga public infrastructure projects nga natumbok nga adunay mga anomaliya.
Matod niya nga ang matag proyekto sa pampublikong imprastraktura nga maapil sa nasangpit nga listahan gisusi pag-ayo aron masiguro nga husto ang impormasyon ug datos nga anaa sa deskripsyon sa proyekto ug opisyal nga report niini.
Dugang ni Dizon nga ang impormasyon nga ipagawas sa nahisgutang listahan dili makaapekto sa mga kaso nga ilang ipasaka batok sa mga kontraktor, empleyado sa DPWH, ug uban pa nga may kalambigitan sa flood control scandal.
Matod sa kalihim, bisan og daghan na nga mga flood control projects ang maapil sa nahisgutang listahan, sigurado nga madugangan pa kini samtang nagdagan ang sunod-sunod nga inspeksyon.
Matod niya nga kining tanan ipagawas sa publiko isip kabahin sa transparency campaign sa ahensya ubos sa iyang bag-ong pamunuan.
