Nipasalig ang Department of Public Works and Highways (DPWH) sa publiko nga wala’y bisan unsang dokumento nga may kalabutan sa gihimong imbestigasyon sa flood control anomaly ang nawala atol sa sunog nga miigo sa ilang Bureau of Research and Standards (BRS) sa Quezon City niadtong Miyerkules, Oktubre 22, 2025.
Sumala sa DPWH, ang BRS, nga nagdumala sa panukiduki ug pagpalambo sa mga polisiya ug pamantayan alang sa mga proyektong pang-imprastraktura sa gobyerno, usa sa mga yunit nga nadaot sa insidente.
Ang inisyal nga imbestigasyon nagpakita nga ang kalayo misugod human mibuto ang usa ka computer unit sa sulod sa Materials Testing Division, nga maoy hinungdan sa pagkaylap niini.
Gipasabot usab sa ahensya nga nakuha ug luwas ang tanan nga may kalabutan nga dokumento ug datos nga kabahin sa mga proyekto sa flood control, ilabi na kadtong ginatan-aw sa kasamtangang imbestigasyon.
Gidugang sa DPWH nga padayon ang imbestigasyon sa hinungdan sa insidente ug gipahigayon ang inspeksyon sa seguridad sa mga pasilidad aron malikayan ang susamang hitabo sa umaabot.
