Paningkamutan sa Department of Public Works and Highways nga makakuha og igong pundo sa sunod tuig alang sa pagtukod og sabo dam sa mga dagkong sapa sa Metro Cebu.
Mao kini ang gipaambit ni Director Toribio Noel Ilao, Bureau of Equipment Director sa DPWH nunot usab sa pasalig sa Presidente nga pangitaan og pamaagi human sa mga isyu nga gikalambigitan sa ahensya.
Basi sa ilang pag-inspeksyon sa Sugbo nga dako og tabang ang Sabo dam nga maoy magpatunga sa tubig nga gikan sa bukid paingon na sa ubos nga bahin.
Gihimug-atan usab niini nga dili kini komplikado nga dam gumikan ang tumong lang sa maong interbensyon kay maminusan ang kapaspas sa pagdagayday sa tubig.
Sa pagkakaron, subsob ang ilang pagsusi sa mga kasapaan gumikan dili usab mamahimo nga butangan lang dayon og sabo dam nga walay igong pagtuon.
Sa pikas bahin, gipaambit usab ni Ilao ang dakong hagit nga ilang nakita sa Central Cebu ang problema sa solid waste.
Matud niini nga dili gihapon epektibo mga interbensyon gumikan sa nagpadayon ug nagkadaghan nga basura sa mga sapa sa rehiyon.
Busa, gihimug-atan niini ang kamahinungdanon sa pag-partisipar sa publiko aron magmalampuson ang Kontra Baha hilabi na sa aspeto sa Solid waste management.
