Gibutyag ni DPWH Secretary Vince Dizon nga bisan og kalit lang ang kausaban sa pamunoan na iyahang gihuptan, gikinahanglan nga sundon kini niya ug atubangon ang bag-ong hagit sa ahensya.
Gihatagan og gibug-aton sa bag-ong kalihim nga ang sunod nga 60 ka adlaw mahimong mahinungdanon alang sa departamento, tungod kay kini magpakita kung giunsa ang pagpauswag sa mga operasyon sa departamento pagkahuman sa mga kontrobersiya nga giatubang niini.
Gitataw niini, nga importante nga adunay re-organization aron hingpit nga malimpyo ang mga operasyon sulod ug gawas sa ahensya.
Samtang sa pikas bahin, niinsistir usab si Dizon nga gikinahanglan ang mas lawom nga imbestigasyon sa mga flood-control projects tungod kay nagtuo siya nga problema na sa nasud ang maong mga isyu sulod na sa pipila ka dekada.
Busa, gipasalig niini nga andam ang departamento nga makig-alayon sa usa ka independenteng komisyon kon gikinahanglan nga i-review bisan ang mga karaan nga proyekto sa miaging administrasyon ug mahunong na kining maong anomaliya.
